Latest News

ዩኒቨርሲቲው በመሬት አጠቃቀም የሚስተዋሉ ችግሮችን በዘላቂነት ለመፍታት በምርምር ታግዞ እየሰራ መሆኑን አስታወቀ::
የዜናውን ሙሉ መረጃ ለማግኘት ቀጣዩን ሊንክ ይጫኑ፡ https://www.ena.et/?p=61010

A delegation of the University of Applied Sciences from Germany and of GIZ from Addis Ababa visit BDU.

During their visit and the discussion held therewith, several possible partnership areas have been assessed. Among many strategic partnership programs, a Joint Masters in Agricultural Management which will involve staff and student exchange has particularly been highlighted as one of the feasible areas of cooperation and partnership. It is presumed that MoU shall be signed in the near future.

                     የተሻሻለ ሰብል ዝርያ በሰርቶ ማሳያ የመስክ ምልከታ ተደረገ

የባሕር ዳር ዩኒቨርሲቲ ቤነፊት ሪያላይዝ (BENEFIT-REALISE) ፕሮጀክት በታች ጋይንት ወረዳ ቆጥ መንደር የተሻሻለ የስንዴና ገብስ ዝርያ ሰርቶ ማሳያ ላይ የመስክ ላይ ጉብኝትና ምክክር መስከረም 26 አደረገ፡፡

የባሕር ዳር ዩኒቨርሲቲ ቤነፊት ሪያላይዝ (BENEFIT-REALISE) ፕሮጀክት ማኔጀር የሆኑት ዶ/ር አልማዝ ጊዜው በመድረኩ እንደተናገሩት ፕሮግራሙ እየሰራ ያለው CASCAPE እና ISSD ከተሰኙ ፕሮግራሞች የተገኙ ምርጥ የግብርና ተሞክሮዎችን የምግብ ዋስትናቸውን ባላረጋገጡ 10 የፕሮግራሙ ወረዳዎች ላይ ማስፋት ነው፡፡ ለዚህም ውጤታማነት የባሕር ዳር ዩኒቨርሲቲ ክላስተር የሶስት ዓመት ፕሮግራም ምርጥ ተሞክሮዎችን በማላመድ፣ በማረጋገጥ እና በማስፋት የህብረተሰብ ክፍሎችን፣ የድርጅቶችንና የተቋማትን አቅም ለመገንባት በሚያደርገው ጥረት በደቡብ ጎንደር ጋይንት ወረዳ ቆጥ መንደር ቀበሌ ታይ የተሰኘ የስንዴ እና ትራቪለር የሚባል የቢራ ገብስ ዝርያ የማሳ ላይ ሰርቶ ማሳያ እና የቅድመ ማስፋፋት ስራዎች እንደተሰራ ተናግረዋል፡፡

የፕሮግራሙ ተግባር ተቀብለው እየሰሩ ያሉ አርሶ አደሮች እንዳሉት የቀረበላቸው ዝርያ እስካሁን ከተመለከቱት የተሻለ መሆኑን ተናግረው ለመኖ የሚሰጠው ውጤት አናሳ በመሆኑ ቢሻሻል በማለት አሁንም የግብዓትና የማማከር ድጋፋቸውም ከዚህ በላቀ መልኩ እንዲቀጥል አሳስበዋል ፡፡ ከዚህ ባሻገር በመስክ ምልከታው በታዩ ጠንካራ ጎኖችና ጉድለቶች ላይ ከወረዳ እስከ ክልል ከሚገኙ የፕሮጀክቱ አጋር አካላት ጋር የአካባቢው አርሶ አደሮች በተገኙበት ምክክር ተደርጓል፡፡ በምክክሩም ላይ ከአርሶ አደሮች እና ከግብርና ባለሙያዎች ለተነሱ ጥያቄዎች ምላሽ ተሰጥቷል፡፡

በመጨረሻም የባሕር ዳር ዩኒቨርሲቲ ምርምርና ማህበረሰብ አገልግሎት ም/ፕሬዝዳንት ዶ/ር ተስፋዬ ሽፈራው እንዳሉት 2011-ለ2012 በጀት አመት በተሠሩ የግብርና የተግባር ስራዎች ላይ ጠንካራና ደካማ ጎኖችን በግልፅ ተመልክቶ ደካማውን ደካማ ጠንካራውን ጠንካራ ለማለት እና አዳዲስ አሰራር ፣ ዝርያዎችንና ቴክኖሎጂዎችን ፤ ከቀበሌ ቀበሌ ፣ ከአርሶ አደር ወደ አርሶ አደር ለማስፋፋትና ለአካባቢው ተስማሚ የሚሆነውን ዝርያ ለመምረጥ የመስክ ምልከታው ጥሩ አጋጣሚ ነው ብለዋል፡፡

 

በተማሪዎች አቀባበል ዙሪያ ከባሕር ዳር ከተማ ወጣት ማህበራት ጋር ምክክር ተደረገ !!

በሙሉጌታ ዘለቀ

የባሕር ዳር ዩኒቨርሲቲ ከፍተኛ አመራሮች በ2012 ዓ.ም. የትምህርት ዘመን ወደ ዩኒቨርሲቲው ለሚመጡ ተማሪዎች አቀባበል በማድረግ ዙሪያ ከዘጠኝ በላይ ከሚሆኑ የባሕር ዳር ከተማ ወጣት ማህበራት ጋር በዩኒቨርሲቲው የጥበብ ህንፃ የመሰብሰቢያ አዳራሽ ምክክር አደረጉ፡፡

የባሕር ዳር ዩኒቨርሲቲ ኢንፎርሜሽን ስትራቴጂክ ኮምንኬሽ ም/ፕሬዚዳንት ዶ/ር ዘውዱ እምሩ እንዲሁም የባሕር ዳር  ዩኒቨርሲቲ የአስተዳደር ጉዳዮች ም/ፕሬዚዳንት አቶ ብርሃኑ ገድፍ የባህር ዳር ወጣቶች በዩኒቨርሲቲው ፀጥታ ጉዳይና የተማሪዎችን ደንነት ከመጠበቅ አንፃር እያበረከቱት ያለውን አስተዋፆ አድንቀዋል፡፡ አቶ ብርሃኑ አክለውም ዩኒቨርሲቲውም የስራ እድሎችን በመፍጠርና የወጣቶችን አቅም በመገንባት የሚጠበቅበትን እንደሚያደርግ ጠቁመው ወጣቶችም የባሕር ዳር ከተማና  የዩኒቨርሲቲው ስም በበጎ እዲነሳ አሁንም ከዚህ ቀደም ሲያደርጉት የነበረውን አጠናክረው እንዲቀጥሉ አደራ ብለዋል፡፡

ከባሕር ዳር ከተማ የተወጣጡ የወጣት ማህበራት  ተወካዮች እንደገለጹት የባሕር ዳር ዩኒቨርሲቲ ተማሪዎች የሞባይልና የላፕቶፕ ዘረፋዎች የሚደርስባቸው ተብለው የተለዩ ዋና ዋና የሚባሉ መስመሮች የመንገድ መብራቶቻቸው የጠፉ እና አንዳንዶችም መስመር ሊዘረጋላቸው የሚገባ ስለሆነ ዩኒቨርሲቲው ከመብራት ሀይል እና ጉዳዩ ከሚመለከታቸው አካላት ጋር በመሆን እንዲሰራ ጠይቀዋል፡፡  አክለውም ወጣቶቹ በባሕር ዳር ከተማም ሆነ በዩኒቨርሲቲው ምንም አይነት የፀጥታ ችግር እንዳይኖር ተግተው እንደሚሰሩ ተናግረዋል፡፡ በመጨረሻም በተማሪዎች አቀባበል ዙሪያ ለተነሱት ጥያቄዎች በባሕር ዳር   ዩኒቨርሲቲ  ከፍተኛ አመራሮች መላሽ ተሰጥቷል፡፡    

                      በአደገኛ-ፅ ተጠቃሚነት ዙሪያ የምክክር አውደ ጥናት ተካሄደ

በወንዳለ ድረስ

ባሕር ዳር ዩኒቨርሲቲ ከፌደራል ጤና ጥበቃ ሚኒስቴር ፣ ከሳይንስና ከፍተኛ ትምህርት ሚኒስቴር እንዲሁም ከመቋሚያ የማህበረሰብ ድርጅት ጋር በመተባበር መስከረም 20 በሴኔት መሰብሰቢያ አዳራሽ ዩኒቨርሲቲን መሠረት ያደረገ የፀረ ሱስ ንቅናቄ ለማድረግ የአንድ ቀን አውደ ጥናት አካሂዷል፡፡

መድረኩን በንግግር የከፈቱት የባሕር ዳር ዩኒቨርሲቲ ምርምርና ማህበረሰብ አገልግሎት ም/ፕሬዝዳንት ዶ/ር ተስፋዬ ሽፈራው ወደ ዩኒቨርሲቲው የሚገቡ አዲስ ተማሪዎች በአንዳንድ በሱስ ተጠቂ ጓደኞቻቸው ምክንያት ወደ ሱስ የመግባት ችግር እንዳለ አውስተዋል ፡፡ ለዚህም ዶ/ር ተስፋዬ  እንዳሉት መምህራን፣ ሰራተኞችና ኃላፊዎች የድርሻቸውን ሊወጡ እንደሚገባ ጠቁመው የአካባቢው ማህበረሰብም ተማሪዎችን ሱስ የሚያሲዙ የንግድ ቦታዎችን ከመክፈት ቢቆጠቡ በሚል የምክረ ሃሳብ ሰጥተዋል፡፡ ከአውደ ጥናቱም ጠንከር ያለ ተቋም የመፍጠርና ቀጣይነቱ ላይ መስራት ይጠበቃል ብለዋል ፡፡

በአውደ ጥናቱ የመወያያ ፅሁፍ ያቀረቡት የመቋሚያ ማህበረሰብ ልማት ማህበር መስራች እና ዋና ስራ አስኪሃጅ  አቶ ኤልያስ አላዩ ማህበሩ በሀረማያ፣ ሀዋሳና መቀሌ ዩኒቨርሲቲዎች የፀረ ሱስ ንቅናቄ በማድረግ እስካሁን ከ600 በላይ ወጣቶችን ከሱስ መታደግ የቻለ እንደሆነ ተነግሯል፡፡ በሁሉም የሃገሪቱ ክፍል በመንቀሳቀስ ከአደንዛዥ እፅ ተጠቃሚነትና  ሱሰኝነት ራሱን መጠበቅ የሚያስችል ቁመና ያለው ህብረተሰብ መፍጠር የመህበሩ አላማ መሆኑን ጠቁመው የአደገኛ-እፅ ተጠቃሚነትና ሱሰኝነት ዘር ፣ ቀለም ፣ ሃይማኖት፣ ፆታ፣  ስራ፣ እድሜና የኑሮ ደረጃን ሳይለይ ሁሉንም የህብረተሰብ ክፍል እንደሚያጠቃ ተናግረዋል፡፡ በጣም አስከፊ የሆነው የአደገኛ-እፅ ጥፋት፤ አምራች የሆነውን የኢኮኖሚ ክፍል ማለትም ወጣቱን በከፍተኛ ፍጥነት እየጨረሰ መሆኑ ነው ብለዋል፡፡

በአውደ ጥናቱ የሃይማኖት ተቋማትና የዩኒቨርሲቲ ማህበረሰቡን ጨምሮ በከተማው የሚገኙ ተቋማት በመገኘት የዩንቨርሲቲ ተማሪዎች በሱስ የመጠመድ ሂደት ላይ ትኩረት ሰጥተው የተወያዩ ሲሆን በቀጣይም ተማሪዎች ከመግባታቸው በፊት ኮሚቴ በማቋቋም ጠንከር ያለ ስራ ለመስራት እቅድ ይዘዋል ፡፡

 

የባሕር ዳር ዩኒቨርሲቲ የሀገሪቱን ስፖርት ለማሳደግ ፕሮጀክት ቀርፆ እየሰራ መሆኑ ተነገረ !!

……………………………………………………………………………

 በሙሉጌታ ዘለቀ

የባሕር ዳር ዩኒቨርሲቲ እየተዳከመ የመጣውን የእግር ኳስ ስፖርትን ጨምሮ በአትሌቲክስ እና በሌሎችም የስፖርት አይነቶች ከ13 እና ከ15 ዓመት በታች በሚል ምድብ ታዳጊዎችን  ለማሰልጠን ከሦስት ወር በፊት ለታዳጊዎች ይፋዊ ጥሪ አውጥቶ የነበረ መሆኑ ይታወቃል፡፡ በመሆኑም ባሕር ዳር ከተማ ካሉ ትምህርት ቤቶት የተወጣጡ እና ተሰጥኦ ያለቸውን በርካታ ታዳጊዎችን በማሰባሰብ ማጣሪያ ሲያደርግ ቆይቶ በሁለቱ ምድብ የተመረጡ ከአንድ መቶ ሰባ ባለይ ታዳጊዎችን  በፕሮጀክት አቅፎ በዩኒቨርሲቲው የስፖርት አካዳሚ ሊያሰለጥናቸው እንደሆነ ተነገረ፡፡

የባሕር ዳር ዩኒቨርሲቲ ፕሬዚዳንት ዶ/ር ፍሬው ተገኘ በዝግጅቱ እንደተናገሩት ዩኒቨርሲቲው ባስገነባው ሁለገብ የስፖርት አካዳሚ ክህሎት ያለቸው ታዳጊዎች በአካዳሚው የስፖርት መምህራን ታግዘው መሰልጠናቸው ምን አልባት አሁን እየተዳከመ የመጣውን የእግር ኳስ ስፖርት እንዲያንሰራራ የበኩሉን እነደሚያበረክት ገልፀው ለሀገርም ከፍተኛ ኩራት የሚሆኑ ስፖርተኞች ማፍራት እንደሚቻል እምነታቸውን ተናግረዋል፡፡ ዶ/ር ፍሬው አክለውም ይህ እውን የሚሆነው የታዳጊ ህፃናት ጥረት ሳይንሰዊ በሆነ ስልጠና ሲታገዝ መሆኑን ጠቁመው ለዚህ ደግሞ የባሕር ዳር ዩኒቨርሲቲ ስፖርት አካዳሚ መምህራን እና ባሕር ዳር ዩኒቨርሲቲ አስፈላጊውን የቁሳቁስና የቴክኒክ ድጋፍ በማድረግ ለኢትዩጵያ የስፖርት የሚጠበቀውን ማበርከት እንደሚቻ ገልፀዋል፡፡

የአማራ ስፖርት ኮሚሽን የተሳትፎ ስልጠና ውድድር ዳይሬክተር የሆኑት አቶ ምትኩ አክሊሉ የባሕር ዳር ዩኒቨርሲቲ እነዚህን ታዳጊዎች   እና ከ50 በላይ የሚሆኑ የአትሌቲክስ ሰልጣኞችን ለማሰልጠን  እየወሰደ ያለውን ኃላፊነት አድንቀው እየተዳከመ ያለውን ስፖርት ለመታግ ብሎም ተተኪ ስፖርተኞችን ለማፍራት የራሱ የሆነ ከፍተኛ አስተዋፃ እንደሚኖረው ገልፀዋል፡፡ ዳይሬክተሩ አክለውም በክልላችን ያሉ ከፍተኛ የትምህርት ተቋማትም የባሕር ዳር ዩኒቨርሲቲን አርአያ በመከተል ለሀገራችን ስፖርት ማደግ የበኩላቸውን አስተዋፆ እንዲያደርጉ ጠቁመው ባሕር ዳር ዩኒቨርሲቲ ለሚያደርገው በጎ እንቅስቃሴ የአማራ ስፖርት ኮሚሽን ከጎኑ በመሆኑን አቶ ምትኩ ተናግረዋል፡፡

የባሕር ዳር ዩኒቨርሲቲ ስፖርት አካዳሚ ዲን ዶ/ር ተስፋዬ ደሳለኝ በበኩላቸው ስልጠናው በእለቱ የተመለመሉትን ከ13 እና ከ15 ዓመት በታች ያሉ ታዳጊዎችን  እና ከሦስት አመት በፊት በዩኒቨርሲቲው እገዛ እየሰለጠኑ ያሉትን ከ50 በላይ የሚሆኑ የአትሌቲክስ ሰልጣኞች በይፋ በዩኒቨርሲቲው ታቅፈው አስፈላጊው እገዛ እንደሚደረግላቸው ተናግረዋል፡፡

በእለቱ በባሕር ዳር ከተማ ለረጅም አመታት የሴቶችን የቅርጫት ኳስ ቡድን ሲደግፉ የነበሩት አቶ በለጠ ለሚያሰለጥኑት ቡድን የባሕር ዳር  ዩኒቨርሲቲ እውቅና በመስጠት የቁምጣና የማሊያ ሽልማት ተበርክቷል፡፡በመጨረሻም በፕሮጀክቱ  ለታቀፉ ለሁሉም ታዳጊ ህፃናት የቁምጣና  የማሊያ ሽልማት በባሕር ዳር ዩኒቨርርሲቲ ፕሬዚዳንት በዶ/ር ፍሬው ተገኘ እጅ ተረክበዋል፡፡

በዝግጅቱ ላይ የባሕር ዳር ዩኒቨርሲቲ ፕሬዚዳንት ዶ/ር ፍሬው ተገኘ እና የባሕር ዳር ዩኒቨርሲቲ  ምክትል ፕሬዚዳንት ዶ/ር እሰይ ከበደን  ጨምሮ አሰልጣኝ መምህራን ከአማራ ክልል ስፖርት ኮሚሽን የመጡ የሚመለከታቸው አካላት እና ሌሎች ተገኝተዋል፡፡  

የባሕር ዳር ዩኒቨርሲቲ አስተዳደር ሰራተኞች በዩኒቨርሲቲው የ2011 ዓ.ም. ዕቅድ አፈፃፀምና የ2012 ዓ.ም. ዕቅድ ዙሪያ እየተወያዩ ነው።
በውይይቱ የሳይንስ ኮሌጅ፣ ቢዝነስና ኢኮኖሚክስ ኮሌጅ እንዲሁም የማሪታይም አካዳሚና ዋናው ግቢ አስተዳደር ሰራተኞች ተሳታፊ ሲሆኑ የዩኒቨርሲቲው ከፍተኛ አመራሮችም ተገኝተዋል። የዩኒቨርሲቲው አስተዳደር ጉዳዮች ም/ፕሬዚዳንት አቶ ብርሀኑ ገድፍ የዩኒቨርሲቲውን የ2011 ዓ.ም ዕቅድ አፈፃፀም ሪፖርት ካቀረቡ በኋላ በፕሬዚዳንቱ ዶ/ር ፍሬው ተገኘ አወያይነት ሰራተኛው እየተወያየ ነው።ይህ ውይይት ከሌሎች ግቢዎች አስተዳደር ሰራተኞች ጋርም በመጪዎቹ ቀናት የሚቀጥል ይሆናል።

የአፋር ብሄራዊ ክልላዊ መንግስት ትምህርት ቢሮ  በክልሉ የአርብቶ አደሮች የትምህርት ተደራሽነትና ጥራት ዙሪያ የአቅም ግንባታ ስራ ላይ ባሕር ዳር ዩኒቨርሲቲ ላበረከተው ከፍተኛ አስተዋፅኦ የምስጋና የምስክር ወረቀት አበርክቷል፡፡

 

የመምህራንን የቀድሞ ሙያና ክብር ለመመለስ መስራት እንደሚገባ ተነገረ!!

የመምህርነት ሙያን ማህበረሰባዊ እይታዎችን ለማሻሻል ሃገራዊ ንቅናቄ ማስጀመሪያ የምክክር መድረክ በባሕር ዳር ተካሄደ፡፡

የምክክር መድረኩን በንግግር የከፈቱት የባሕር ዳር ዩኒቨርሲቲ ፕሬዝደንት ዶ/ር ፍሬው ተገኝ  በሀገራችን መምህርነት እንደ ሙያ ጥያቄ ውስጥ እንደገባ የሚያሳዩ ጠቋሚዎች እንዳሉ ተናግረው እየተዳከመ ለመጣው የሙያዎች ሁሉ መሰረት ለሆነው መምህርነት ማህበረሰቡ፣ የመንግስት  ከፍተኛ ትምህርት ተቋማትን ጨምሮ ሌሎች  አጋር አካላት ቀደም ሲል የነበረውን ክብርና ተቀባይነት ለመመለስ ክትትልና ድጋፍ ማድረግ እንደሚጠበቅባቸው ተናግረዋል፡፡ አሁን በሀገር ደረጃ  ያጋጠመው ችግር በአህጉርና በአለምአቀፍ ደረጃ የሚያጋጥም መሆኑን ገልፀው በንቅናቄ ብቻ ሳይሆን በችግሮች ላይ ተመርኩዞ የመፍትሄ ሀሳቦችን በመለየትና ተግባራዊነታቸውን በማረጋገጥ ችግሩን መቀነስ ብሎም ማጥፋት እንደሚቻል ጠቁመዋል፡፡  

ፕሬዝዳንቱ አክለውም ይሀን የተከበረ ሙያ በጥንካሬ እንዲወጣ ከመምህራን ምልመላ ጀምሮ ስልጠናዎችን በበቂ መልኩ መስጠትና መምህራንን ለሚያሰለጥኑ ተቋማት ክትትልና ድጋፍ ማድረግ እንደሚገባ ተናግረዋል፡፡ በአንፃሩ ሙያውን በመሸሽ ጥሩ ደመወዝ የሚያስገኙ የትምህርት መስኮችን የመቀላቀል ዝንባሌዎች እየበዙና እየጠነከሩ  መምጣታቸው የመምህርነት ሙያ አደጋ እንዲጋረጥበት አድርጓል ብለዋል፡፡ በመሆኑም ተማሪው፣ ህብረተሰቡ፣ ፖለቲከኛው እና መንግስት ስለመምህራን ምን ይላሉ ከማለት ባለፈ መምህራን ስለራሳቸው ምን ይላሉ የሚለውን በአንክሮ መመልከት ተገቢ መሆኑን ተናግረዋል፡፡ አንዳንድ መምህራን የሙያው ፍቅር ሳይሆን የገንዘብ ክብርን እንደሚያስቀድሙ ይታወቃል ስለዚህ መጀመሪያ ለሙያው ተገዥ መሆን እንዳለባቸው ገልፀው ደመወዝ በመጨመር ብቻ ሙያው ጠንክሮ እንዲወጣ ማድረግ ይቻላል ብለው እንደማያምኑ ተናግረዋል፡፡

በምክክር መድረኩ ከተለያዩ ቦታዎች የመጡና በምክክር መድረኩ ላይ ተገኝተው የመምህርነት ተሞክሮዎቻቸውን ያቀረቡ መምህራንና የተማሪ ወላጅ ማህበር ተወካዮች ንግግር አድርገዋል፡፡ በዳንግላ ወረዳ በሚገኝ የመጀመሪያ ደረጃ ትምህርት ቤት የሚያስተምሩትና በሀገራችን የበጎ ሰው እጩ ሽልማት ባለቤት የሆኑት መምህር ስዩም ቦጋለ የተሰብሳቢዎችን ቀልብ የያዘ ንግግር አድርገዋል፡፡ በንግግራቸውም መምህር ማለት ለራሱ የሚኖር ሳይሆን እራሱ እንደሻማ ቀልጦ ለተማሪዎቹ ብርሃን የሚሆንና ለተቸገሩ ተማሪዎች ከፈጣሪ በታች በበጎ ተግባር የሚደርስ መሆኑ ተናግረዋል፡፡ እርሳቸው ከደመዎዛቸው 75% በመቀነስ ለተቸገሩ ተማሪዎች እንደሚረዱና በተለያዩ ምክንያቶች ተማሪዎች ችግር ሲደርስባቸው ከጎናቸው በመሆን ሳይሰለቹ እንደሚረዷቸውና በዚህ መልኩ ያስተማሯቸው ተማሪዎች ጥሩ ውጤት በማምጣት ለሀገርና ለወገን ኩራት ሆነው ማየታቸውና በዚህ ስራቸው በሀገር አቀፍ ደረጃ በርካታ ሽልማቶችን ማግኘት እንደቻሉ ተናግረዋል፡፡

በአዲስ አበባ ከተማ የተማሪ ወላጅ ማህበርን ወክለው ንግግር ያደረጉት ኢ/ር ጌታቸው ሰጠኝ እንዳሉት የመምህርነት ሙያ አሁንም ቢሆን እንዳልወደቀ ገልፀው ነገር ግን በማህበረሰቡ ዘንድ መሰራት ያለበትን ግንዛቤ የመፍጠር ስራ ይበልጥ መሰራትና ተማሪዎችም ጥሩ ስነምግባርና ግብረገብነት እንዲኖራቸው እንዲሁም ሀገር ወዳድ ዜጋ ሆነው እንዲያድጉ የመምህራን ሚና ከፍተኛ በመሆኑ በዚህ ላይ ትልቅ ስራ እንደሚጠበቅ ተናግረዋል፡፡

በምክክር መድረኩ ላይ የመምህርነት ሙያ በህብረተሰቡ ዘንድ እንዴት ይታያል እና መምህራን በሙያቸው ተጠቃሚ ባለመሆናቸውና ኑሮአቸውን ለመደጎም ስራቸውን በመልቀቅ ሙያው አደጋ ላይ በመውደቁ የቀደመ ክብሩን ለመመለስ ምን መደረግ አለበት በሚሉ ርዕሰ ጉዳዩች ላይ ጥናታዊ ፁሁፎች ቀርበው ሰፊ ውይይትና ክርክር ተደርጓል፡፡

የምክክር መድረኩ አዘጋጅ እንዲሁም ጥናታዊ ፁኁፍ አቅራቢ የሆኑትና  የባሕር ዳር ዩኒቨርሲቲ የመምህራን  ትምህርት እና የአመራር ልማት የልህቀት ማዕከል ዲን የሆኑት ዶ/ር አስናቀ ታረቀኝ እንዳሉት የአውደ ጥናቱ ዋና አላማ የመምህርነትን ክብርና ሞገስ እንደገና መመለስና ማኅበረሰቡ ስለመምህራን ያለውን ግንዛቤ ማሳደግ ብሎም መምህራን ማግኘት ያለባቸውን የሙያ ክብር እንዲያገኙ መስራት እንደሆነ ተናግረዋል፡፡ በቀጣይም በሀገሪቱ  ውስጥ መምህራንን ከሚያስለጥኑ ተቋማት ጋር በመሆን በትምህርት ጥራት ላይ የጋራ ስራ እየተሰራ  መሆኑን ጠቁመው ይህ ደግሞ መምህርነት ተገቢውን ክብር እንዲያገኝ ከማድረግ አኳያ የጎላ አስተዋፅኦ እንደሚያመጣ ተናግረዋል፡፡

በመጨረሻም በትምህርት ሚኒስቴር የመምህር እና የትምህርት አመራር ልማት ዳይሬክተር የሆኑት ወ/ሮ አሰፋሽ ተካልኝ በሀገራችን ውስጥ ያሉ አምስቱ የልህቀት ማዕከላት ባልተመቻቸና ዘርፈ ብዙ ችግሮች ባሉበት ሁኔታ እየሰሩ ያለውን ስራ አድንቀው ቀጣይ ፖሊሲዎችንና መመሪያዎችን በማውጣት መሬት  ላይ የወረደ ስራ መስራት እንደሚገባ ጠቅሰዋል፡፡ ይህንን ስራ ለመስራት በመተሳሰርና አንድ በመሆን መምህርነት እንደ ሙያ በህብረተሰቡ ዘንድ የሚሰጠው ቦታ ከፍ ይል ዘንድ የተለያዩ መገናኛ ዘዴዎችን በመጠቀም የግንዛቤ ፈጠራ መስራት እንደሚገባ አሳስበዋል፡፡  

በመድረኩ የሁለተኛ ቀን ውሎ የመምህርን የሰው ኃይል አስተዳደር ማዕቀፍን አስመልክቶ ትምህርት ሚኒስቴር ያስጠናው ጥናት የጥናቱ ተሳታፊ በሆኑ ምሁራን ቀርቧል፡፡ በጥናቱ አንደተመለከተው መምህራን ለሃገር ዋልታ ለሌሎች ሙያዎች ደግሞ መሰረት በመሆናቸው ከመምህራን ምልመላ ጀምሮ፣ የመምህራን የሙያ ስልጠና ብሎም መምህራንን በስራ ገበታቸው ላይ እንዲቆዩ የማድረግ እና ከጦረታ በኋላ በሚኖራቸው ህይወት አስፈላጊውን ድጋፍ በመስጠት ከሙያው ሀገሪቷ ማግኘት የሚገባትን ትልቅ ግልጋሎት ማግኘት እንደሚቻል ተነግሯል፡፡ ለዚህም መምህሩን ያቀፈ ስራ እንደሚጠይቅ ተጠቁሟል፡፡

በአውደ ጥናቱ ከተለያዩ የከፍተኛ ትምህርት ተቋማት የመጡ ምሁራን፣ የትምህርት ሚኒስቴር ተወካዮች፣ የመምህራን ማኅበር አመራሮች፣ በተለያየ ደረጃ የሚያስተምሩ መምህራን፣ በመምህርነት ሙያቸው አርአያነት ያለው ስራን ያበረከቱ መምህራን፣ የወላጅ ማህበር ተወካዮች እና ሌሎች ተገኝተዋል፡፡

 

Pages