BSc in Data Science curriculum

የባሕር ዳር ዩኒቨርሲቲ ሳይንስ ኮለጅ የStatistics ትምህርት ክፍል አዲስ ለሚከፍተው የመጀመሪያ ዲግሪ ፕሮግራም ሀገር አቀፍ የስርዓተ ትምህርት ግምገማ አካሄደ

 

በሙሉጌታ ዘለቀ

የባሕር ዳር ዩኒቨርሲቲ ሳይንስ ኮለጅ የStatistics ትምህርት ክፍል የባችለር ድግሪ በዳታ ሳይንስ (BSc in Data Science curriculum) ስርዓተ ትምህርት ግምገማ አካሄደ፡፡

 

በመርሃ ግብሩ መክፈቻ ላይ የባሕር ዳር ዩኒቨርሲቲ የአካዳሚክ ጉዳዮች ም/ፕሬዚዳንት ዶ/ር እሰይ ከበደ  የእንኳን ደህና መጣችሁ መልዕክት ካስተላለፉ በኋላ  አሁን ባለው ተጨባጭ ሁኔታ በሀገራችን በሙያው የሰለጠነ የሰው ሀይል ባለመኖሩ ፕሮግራሙ መከፈቱ ለዩኒቨርሲቲያችን ብሎም ለሀገራችን በዳታ ሳይንስ የሰለጠነ እና ዳታዎችን ሳይንሳዊ በሆነ መልኩ የሚተነትንና የሀገራችንን ጥቅም የሚያስከብር የሰው ሃይል ለማፍራት ከፍተኛ አስተዋፃ እንደሚኖረው ተናግረዋል፡፡ ዶ/ር እሰይ አክለውም የባሕር ዳር ዩኒቨርሲቲን ጨምሮ ሌሎች የምርምር ዩኒቨርሲቲዎች በጋራ በመሆን ፕሮጀክቶችን በመቅረፅ ለሀገራዊ ተልዕኮ ፋይዳ ያለቸውን የትምህርት ፕሮግራሞችን ማስፋት ተገቢ ነው ብለዋል፡፡ ከዚህ ጋርም ተያይዞ የ Statistics ትምህርት ክፍል የባችለር ድግሪ በዳታ ሳይንስ (BSc Data Science curriculum)  አዘጋጅቶ በውስጥ ሙሁራን ማስገምገሙና አሁን ደግሞ በሙያው የጠለቀ እውቀት ባላቸው በሀዋሳ ዩኒቨርሲቲ፣ በጎንደር ዩኒቨርሲቲ እንዲሁም በአዲስ አባባ ዩኒቨርሲቲ ሙሁራን ስርዓተ ትምህርቱ መገምገሙ ለፕሮግራሙ ውጤታማነት አስተፅኦው የጎላ እንደሚሆን ተናግረዋል፡፡          

 

ዶ/ር አወቀ ስዩም የStatistics ትምህርት ክፍል ተጠሪ እንዲሁም የስርዓተ ትምህርቱ አዘጋጅ ኮሚቴ እንዳሉት የአውደጥናቱ ዓላማ የዳታ ሳይንስ ፕሮግራም መክፈት መሆኑን ጠቅሰው በአሁኑ ወቅት  አለማችን በዳታ ሳይንስ ቴክኖሎጂ ከማንዋል ወደ ዲጂታል እየተሸጋገረች በመሆኑ ቴክኖሎጂውን የምንተገብርበት ዋና መሳርያ ዳታ ሳይንስ መሆኑን አስረድተው ሀገራዊ መረጃዎችን በአንድ ቋት አስገብቶ ውሳኔ ለሚሰጠው የሀገሪቱ ቁልፍ ሰው ትክክለኛ ውሳኔ እንዲሰጥ ከፍተኛ አስተፅኦ እንዳለው ተናግረዋል፡፡  ስርዓተ ትምህርቱን በመስኩ ልምድ ባላቸው ሙሁራን ከጎንደር ዩኒቨርሲቲ ዶ/ር አስራት አፀደወይን፣ ከሀዋሳ ዩኒቨርሲቲ ዶ/ር ዘይቱ ጋሻው እንዲሁም ከአዲስ አበባ ዩኒቨርሲቲ ዶ/ር ደጀን ተስፋው በዝርዝር በመገምገም ከፍተኛ ግብዓት መስጠታቸውን ዶ/ር አወቀ ስዩም ተናግረዋል፡፡

 

የሳይንስ ኮሌጅ ዲን ዶ/ር  ሙሉቀን አክሊሉ በአውደጥናቱ መዝጊያ ላይ እንዳሉት ኮሌጁ አሁን ያሉትን ስርዓተ ትምህርት የመከለስና አዳዲስ ስርዓተ ትምህርት በማዘጋጀት እያፀደቀ አዳዲስ ፕሮግራሞችን እንዲከፈቱ በማድረጉ በሀገራችን ያለውን የተማረ የሰው ሃይል የትምህርት እድል በመፍጠር ረገድ የበኩሉን አስተዋፆ እያደረገ መሆኑን ተናግረዋል፡፡  ዶ/ር  ሙሉቀን አክለውም ኮሌጁ የኮሌጁን የቤተ-ሙከራ እጥረት ለመቀነስ ማዕከላዊ ቤተ-ሙከራ ተደራጅቶ የቁሳቁስ ገጠማ እንደሚቀረውና ለዚሁ የሚሆን በጀት እንዲመደብላቸው ዶ/ር እሰይ ከበደ ባሉበት ተናግረዋል፡፡

በመጨረሻም በአውደጥናቱ ላይ ከተለያዩ ግቢዎች የተውጣጡ መምህራንና ተማሪዎች እንዲሁም የስራዓተ ትምህረቱ ገምጋሚዎች አማካኝነት በተነሱ ሀሳቦት ላይ ውይይት ተደርጎባቸዋል፡፡